TALUMPATI | Kahirapan, masusulusyunan pa ba?

            Wala na tayong bigas pangsaing! ‘Yong matrikula ni nene! Renta ng bahay. Bayarin sa kuryente at tubig. ‘Yong utang sa bumbay! Inay ko po! Bakit ba ang hirap maging mahirap?

            Isang pagbati ng magandang araw sa ating lahat.

            Kahirapan – iyan ang isa sa pinakamalaking suliraning kinahaharap ng ating bansa. Isang suliranin na deka-dekada nang pahirap sa bawat Pilipino. Isang suliranin na nagsisilbing malaking dungis sa ating bayan.

            Ayon sa istatistika ng Social Weather Stations noong Disyembre 2019, 54 porsyento ng pamilyang Pilipino ang naniniwalang sila ay mahirap o may katumbas na 13.4 milyong Pilipino. Kaya hindi na nakapagtataka kung bakit saanmang dako ng bansa tayo makarating, hinding-hindi mawawala ang problema sa kahirapan.

            Ngayon, may pag-asa pa bang masulosyunan ang kahirapan sa ating bansa? Isang malaking oo.

            Ayon sa ginawang pananaliksik nina Muhammad Afzal, Muhammad Ehsan Malik, Ishrat Begum, Kafeel Sarwar at Hina Fatima sa bansang Pakistan, napag-alaman nilang ang edukasyon ay nakatutulong upang mabawasan ang kahirapan.

            Ipinapakita lamang nito na ang edukasyon ay isa sa mga solusyon upang makaahon tayo sa kahirapan. Kung bibigyan natin ng halaga at kung gagamitin natin nang tama ang edukasyon, may pag-asang guminhawa ang ating buhay.

            Isa pa sa naging dahilan ng kahirapan sa ating bansa ay ang mga pulitikong korap. Imbes na ialan sa programang pangmahirap ang kaban ng yaman ay inilalaan nila ito sa mga bagay na ikababango lang ng kanilang pangalan; at ang mas malala pa’y binubulsa nila ang kaban para sila ang hindi maghirap.

            Nakatatawa hindi ba? Kung sino pa ang ating inaasahan ay sila pang manghihila.

            Ngunit, isipin din nating ang pamahalaan ay hindi pabrika ng kaginhawaan. Huwag mong iasa sa kanila ang ginhawang gusto mo. Matuto tayong magsumikap. Hindi tayo aahon kung buong araw lang tayong nganga sa isang tabi. Ang kaginhawaan ay ang tunay na pinaghihirapan.

            Marami pang solusyon upang guminhawa tayo sa lawa ng ating kalugmukan. Hindi pa huli ang lahat para sa ating minamahal na bansa. Ngayon nating ipakita ang “Bayanihan Sipirit” ng mga Pilipino. Hindi ito laban ng presidente o ng pamahalaan lamang – laban ito ng lahing matatapang.

            Ang kahirapan ay hindi panghabangbuhay. Nasa sa atin, nasa sa iyong mga kamay ang solusyon sa problemang ito. Oras na para bumangon tayo. At ikaw, oo ikaw, ay may malaking responsibilidad sa labang ito.

            Iwaksi natin ang kahirapan na sumisira sa ating bansa at sa ating pag-asa. Laban, Pinas!