TALUMPATI | Korapsyon: Butas sa Bulsa ng Bayan

Sapat na programa para sa lahat. Sapat na pagkain para sa mahihirap. May badyet ang edukasyon, pangkalusugan at pang-impastraktura. Walang maghihirap, walang maghihikahos. Ngunit, bakit ang lahat ng mga ito ay nauwi sa isang malaking sana?

Isang pagbati ng magandang araw mga kaibigan at sa inyong mga nakikinig.

Korapsyon – iyan ang sistemang talamak sa ating pamahalaan. Isang sistemang nagiging ugat ng matinding kahirapan sa ating bansa.

Ayon sa ginawang pag-aanalisa ng Transparency International sa itegridad ng pamahalaan ng 180 na bansa noong 2019, bumaba ang puwesto ng Pilipinas mula ika-99 noong 2018 patungo sa ika-113. Ipinapahiwatig lamang nito na mas lumalala ang kaso ng korapsyon sa ating bansa.

Isang nakababahalang balita para sa mga Pilipinong buwan-buwang naghuhulog ng buwis sa kaban ng ating bayan.

Kung tutuusi’y hindi na bago sa ating pandinig ang problemang ito. Ang masama ay sa bawat pagdaan ng bawat administrasyon ay mas lalong lumalala ang isyung ito sa ating pamahalaan. Isang sakit na tila’y natural na sa mga pulitikong naluluklok sa upuang pinag-aagawan nila.

Milyon-milyong salapi ang napababalitaang nawawala sa bawat ahensya ng ating bansa na sana’y pondo para sa mga proyekto. Isang magandang halimbawa rito ang hinihilaang anomalya at iregularidad ng Philippine Health Insurance Corporation. Maraming Pilipino ang umaasa at nagtitiwala sa institusyong ito, kaya hindi na nakapagtataka kung bakit napakalaking usapin nito sa ating bansa.

Marami nang napapatunayang nagkasala sa masamang gawaing ito, ngunit ganoon pa man, hindi pa rin nasusupil ang mga buwaya sa pamahalaan. Ang butas sa ating kaban ay mas lalo lang lumalaki sa bawat pagdaan ng panahon.

Nakalulungkot isipin na kung sino pa ang maituturing na mga edukado ay sila pang nananamantala sa mga Pilipino. Ginagamit ang utak para utakan ang ordinaryong mamamayan. Ang kanilang pagkaganid sa salapi ang siyang nagpapalugmok sa maraming mahihirap

Sana ay may sapat na kagamitan para sa de-kalidad na edukasyon. Sapat ang badyet para sa kalusugan ng mga Pilipino. May programang magbibigay ng trabaho sa wala. May badyet para makatulong sa mahihirap. May bulsang pagkukunan tuwing may sakuna. Isang malaking sanang hindi maabot, dahil ang pagsupil sa korapsyon ay isa ring malaking sana.

Walang vaccine o antidote sa pandemik na ito, dahil ang korapsyon ay isang kaugalian. Walang pormula o matematika. Ang kailangan natin ay isang lider na handing making sa panambitan ng kaniyang mga kababayan. At, tayo. Tama. Kaya nating supilin ang korapsyon sa ating bansa. Tayo ang may kapangyarihang magtakda kung sino ang uupo sa upuan ng pamahalaan. Gamitin natin ang isip at hindi ang puso.

Tulungan natin ang bayan. Hindi matatahi ang butas sa ating kaban kung tayo mismo ang nagbibigay ng gunting sa mga ganid na pulitiko.

Buksan ang isip, palawigin ang karapatan. Iwaksi ang korapsyon, Pilipinas ay ating ibangon.