ESTRUKTURANG FILIPINO | Uri ng Pangngalan ayon sa Konsepto

 Uri ng Pangngalan ayon sa Konsepto

Sa nakaraang aralin, napag-alaman ang dalawang uri ng pangngalan ayon sa kayariang pansemantika nito. Maliban diyan, maaari ding mauri ang pangngalan ayon sa konsepto nito.

 
Uri ng Pangngalan ayon sa Konsepto

Ang Pangngalan ay may 2 uri ayon sa konsepto:

1. Tahas o Konkreto

Karamihan sa mga pangngalan ay nabibilang sa tahas o konkreto. Ito ang mga pangngalan kayang damahin ng limang pandama: paningin, pandinig, panlasa, pang-amoy, o pandama. Karaniwan sa mga pangngalang nabibilang dito ay materyal o nahahawakan.

Halimbawa: hangin, aso, kapatid, aklat, selpon

May 2 Uri ng Pangngalang Tahas o Konkreto:

A. Lansakan

Ito ay mga pangngalang tumutukoy sa ngalan ng isang pangkat o grupo.

Halimbawa: batalyon, pamilya, banda, klase

B. Di-Lansakakan

Ito ay tumutukoy sa mga pangngalang isinasaalang nang isa-isa.

Halimbawa: guro, lapis, laruan, sundalo, mag-aaral, anak, magulang

 

2. Basal o Abstrak

Ang mga pangngalang basal o abstrak ay mga pangngalang hindi nadarama gamit ang alinman sa limang pandama ng tao. Karamihan, ang mga pangngalang nabibilang dito ay ngalan ng isang diwa o kaisipan.

Halimbawa: pag-ibig, kapayapaan, katalinuhan, oras, kalayaan