ESTRUKTURANG FILIPINO | Uri ng Pangngalan ayon sa Kailanan

Kailanan ng Pangngalan

Sa araling ito, ating tatalakayin ang mga kailanan ng pangngalan.

Kailanan ng Pangngalan

Ito ay tumutukoy sa dami o bilang ng isang pangngalan. Maaaring mabago ang bilang ng pangngalan gamit sa tulong ng iba pang mga salita.

1. Isahan

Ang bilang ng pangalan ay isa lamang.

Mga Hudyat:

A. Paggamit ng mismong pangngalan.

Hal:

• Ang ina ay nagluluto.
• Tunay na mayaman sa kultura ang Pilipinas.

B. Paggamit ng pang-uring “isa”.

Hal.

• Ako ay mayroon lamang isang mansanas.
• Siya ay may isang kaibigan.

C. Paggamit ng isahang pantukoy: ang, si, kay, atbp.

Hal.

• Ang bata ay nadapa sa kalsada.
• Si Nena ang hinirang na nagwagi sa timpalak ng pag-awit.
• Ang lapis na ito ay kay Anna.

2. Dalawahan

Ang bilang ng pangalan ay dalawa.

Mga Hudyat:

A. Paggamit ng pang-uring “dalawa”.

Hal.

• Ang dalawang mag-aaral ay nahuli sa klase.
• Bumili ako ng dalawang mansanas sa tindahan.

B. Pagkakabit ng unlaping “mag-” sa pangngalan.

Hal.

• Kami ay magkaibigan lamang.
• Ang mag-ina ay sabay na nagtungo sa simbahan.

3. Maramihan

Ang bilang ng pangngalan ay tatlo o higit pa.

Mga Hudyat:

A. Paggamit ng mga pantukoy na maramihan: ang mga, sina, kina, ng mga, atbp.

Hal.

• Ang mga estudyante ay tahimik na nakikinig sa kanilang guro.
• Sina Jose, Maria, at Anna ay matalik kung mga kaibigan.
• Ang proyektong ito ay gawa nina Maria, Josefa at Georgia.
• Bumili ako ng mga gamot sa botika.

B. Paggamit ng pang-uring pamilang.

Hal.

• Ako ay may sampung daliri.
• Tatlong daang manonood ang dumalo sa konsiyerto.

C. Paggamit ng unlaping “mag-” at pag-uulit sa unang pantig ng pangngalan.

Hal.

• Ang mag-iina ay masayang kumakain sa parke.
• Kami ay malapit na magkakaibigan.