TALUMPATI | Buhay

Buhay na marahil ang pinakamagandang regalong ipinagkaloob sa atin ng Diyos – isang regalong dapat nating pahalagahan. Masyadong mahiwaga ang buhay ng tao, hindi natin alam kung kailan ulit ito kukunin sa atin ng Diyos. Walang nakaaalam, nakababatid, kung kailan, saan o paano; tanging Diyos lamang ang may alam. Kaya, ang bawat segundo ng ating buhay at bagong umaga na gigising tayo ay isa nang malaking biyaya mula sa ating Maykapal.

Masarap ang mabuhay sa paraisong ipinagkaloob sa atin. Naaamoy ang sariwang hangin, nalalasahan ang mga matatamis na prutas, nakikita ang obra maestrang tanawin at nararanasang pagmamahal. Ngunit, sa kabila nito, ang buhay ay hindi magiging buhay kung walang sakit, pagkabigo, problema at kalungkutan. Mga pagsubok na magpapahirap o magpapatatag sa atin.

Napakagulo ng buhay ng mga tao. Maraming balintuna’t mga katanungang mahirap mahanapan ng kasagutan. Lahat ay may katumbas na kasalungat. May lungkot at saya, may pag-ibig at pagkamuhi, may pagkarapa at pagbangon, may mabuti at masama.

Hindi ba maaaring parating masaya? Walang nasasaktan, walang nahihirapan, walang lumuluha. Ngunit anumang pilit nating pagtuklas, natutuon pa rin tayo sa ideyang lahat ng bagay ay may kapalit. Uulan pero titila, magmamahal ka pero masasaktan, magkikita pero mag-iiwanan, kasalukuyang magiging kasaysayan. Walang permanente sa mundo. Lahat ay nagbabago, lahat ay nawawala.

Ganoon pa man, dapat nating unawain ang buhay. Lahat ay may dahilan. Ang mga luha, hagulgol ay kailangan para makita natin ang tunay na saya. Ang pagkabigo at pagkasawi ay kailangan para sa tagumpay. Ang sakit at hapdi ay kailangan para makita ang tunay na pagmamahal. Tama, lahat ay may rason.

Masyado talagang mahiwaga ang buhay ng mga tao. Isang hiwagang kahit kailan ay hindi natin mauunawaan at masasagutan. Pero isa lang ang sigurado: may Diyos tayong gagabay at magmamahal sa atin. Maniwala tayo sa Kaniya dahil Siya lamang ang nakaaalam ng lahat. Siya ang may hawak ng sagot ng mga tanong na sino, ano at bakit.

Diyos lamang ang higit nakauunawa sa misteryo ng ating mahiwagang buhay.