TALUMPATI | Edukasyon: Susi ng Kaunlaran

Edukasyon!

Isang salita na may siyam na titik lamang ngunit malaki ang ginagampanan sa lipunan. Isang salita na madaling bigkasin at sulatin ngunit mahirap makamtan. Isang salita na kayang bumago sa ating kinabukasan.

Pagbati ng magandang araw sa inyong lahat na nakikinig.

Muli nating balikan ang isang tanyag na kasabihan, "Ang edukasyon ay ang susi ng kaunlaran.” Isang susi na magbubukas sa atin ng pintuan ng kaginhawaan.

Oportunidad na marahil ang malaking naiaambag ng edukasyon sa bawat isa. Binibigyan tayo nito ng isang bagong oportunidad upang baguhin ang takbo ng ating kapalaran. Ito rin ang nagbubukas sa atin ng pintuan ng kaalaman na ating gagamitin sa pagharap ng hamon sa buhay. Ang edukasyon din ang nagbibigay sa atin ng pagkakataon upang umunlad at magkaroon ng isang magandang kinabukasan.

Kung tutuusin, kapwang karapatan at isang prebilehiyo kung maiituring ang magtamasa ng edukasyon. Isang karapatan na hindi abot ng iilan dahil sa hindi matapos-tapos na problema ng kahirapan.

Ngunit, alam ninyo ba na ang edukasyon din ang susi ng pag-unlad ng ating bansa?

Ang mga naglalakihang gusali, mga transportasyon, mga kalsada, mga magagarang mansyon at marami pang ibang mga bagay na nagpapatunay ng kaunlaran, lahat ng iyon ay ‘di matutunan ng mga tao kung wala ang edukasyon. Datapwat, hindi lamang ang mga materyal na bagay na iyan ang hinuhubog ng edukasyon. Humuhubog din ito ng masisipag na manggagawa ng ating bansa. Ang mga manggagawa nating patuloy na hinahangaan at pinagkatitiwalaan dahil sa hindi matatawarang kakayahan na pinanday ng ating edukasyon.

Ibinunga rin ng edukasyon ang mga propesyunal na personalidad sa ating bansa. Ang mga guro, doktor, abogado – lahat sila ay hindi magiging matagumpay kung wala ang tulong ng edukasyon. Maging ang mga mangangalakal sa ating bansa, sila ay bunga ng edukasyon.

At sa lahat ng naging bunga ng edukasyon ito ang pinakamahalaga – ang pangulo. Ang pangulong siyang haharap sa isyung pambansa at ang magsusulong ng kaunlaran. Ang kaniyang kaalaman na pinanday ng edukasyon ang siyang magiging sandata niya upang hawakan nang mahusay ang isang bansa.

Pinatutunayan lamang nitong ang edukasyon ay isa sa malaking salik ng ating pag-unlad.

Kung walang edukasyon ay walang manggagawa. Kung walang edukasyon ay wala rin tayong negosyante at mangangalakal. Wala tayong propesyunal tulad ng doktor, abogado o guro. At higit sa lahat,  wala tayong responsableng pangulong maglalathala ng ating kaunlaran.

Mahalaga ang edukasyon sa lahat, anumang antas at angkan. Huwag nating sayangin ang pagkakataong ito dahil maswerte ka. Seryosohin ito sapagkat ikaw rin ang makikinabang nito sa huli.

At tayong may pinag-aralan, gamitin natin ito upang makatulong; at hindi upang makapanlamang ng kapwa mo tao. Dapat batid mo kung ano ang pinagkaiba ng tama sa mali at ng dapat sa ‘di-dapat gawin. Dapat maging ehemplo at inspirasyon tayo sa iba.

Kaya bilang isang edukadong tao, dapat tayo ang magiging simula ng kaunlaran – hindi ng kasamaan at kasakiman. Tayo ang magsisilbing ugat sa inaasam nating kaunlaran. Dahil sa atin magmumula ang panibagong yugto ng edukasyon. Isang edukasyong magbubukas ng bagong pag-asa. Isang edukasyong magiging daan patungo sa inaasam-asam nating kaunlaran.