TALUMPATI | Bulaklak ng Eleksyon

Mga programa – kaliwa’t kanan na. Mga kalsada – naayos na. Mga kalat – nalinis na. Waiting shed – napinturahan na. May pagkain ang mahirap, may papel ang estudyante. Salamat kay Mayor! Kailan niya ginawa? Sa panahon ng eleksyon.

Isang magandang araw sa lahat ng mga Pilipinong naririto.

Eleksyon – isang napakamahalagang panahon para sa bawat Pilipinong nag-aasam ng pagbabago. Isang pagkakataong magtakda kung sino ang siyang mauupo sa iisang upuang pag-aawayan ng marami. Isang panahong nagbigay ng prebelehiyo sa bawat isa na itakda ang napupusuang kandidato. Hindi ba’t napakagiting pakinggan? Isang bilog sa balota, lahat ng Pilipino ang makikinabang.

Ngunit ito rin ang panahon ng pamumulaklak ng mga mayayabong na salita ng mga politiko.

Aminin man natin o hindi, nababahiran na ng dumi ang eleksyon sa ating bansa. Nariyan ang mga pangakong hindi naman natutupad. Mga programang hanggang sa plano lamang. Mga polisiyang naging pantasya lamang. Pagbabagong nauuwi sa panloloko.

Ginagamit ng ilan ang eleksyon para pabanguhin ang pangalan nilang simbaho ng mga basura nilang pangako.

Andiyan ang biglang pagpapaayos ng kalsadang buwan-buwan ay kalbaryo ng mga tao. Mga programang mas higit na kailangan ng karamihan noon. Pagpapalinis sa mga kalsada dahil gusto raw ni mayor na maging malinis ang kaniyang bayan. Mga libreng school supplies, check-up, seminars, at ultimong palibing – lahat ay nagsipaglabasan nang dumating ang usaping eleksyon. Lahat ng mga pinangako nila na ilang taong hinintay ng mga tao ay ginawa, ginagawa at gagawin pa lang sa panahon ng eleksyon.

Hindi mangmang ang mga Pilipino. Maraming mahirap, oo. Pero, hindi mangmang. Alam namin ang pinagkaiba ng isang tunay na bulaklak sa isang artipisyal na gawa ng mga plastik na ngiti at pag-aalala ng mga politiko.

Nawawalan ng saysay ang eleksyon dahil sa ginagawa ng ilang politiko. Inaakit ang mga tao sa mga bagay na kahinaan nila para iboto ulit sila sa susunod na termino. Hinahalina ng mga mabulaklak nilang salita ang mga Pilipinong sabik sa samyo ng kaginhawaan at pagbabago.

Pero, hindi ko rin naman sila masisisi. Maraming Pilipino ang minamaliit ang prebelehiyong nasa kanilang mga kamay. Binoboto kung nasaang partido sila nabibilang. Binoboto kung sino ang nasa t-shirt, pamaypay at kendi na binigay sa kanila. At mas nakalulungkot, may mga Pilipinong binebenta ang pagkakataong ito sa isang panandaliang kasiyahan.

Hindi na iniisip kung sino ang nararapat pang iboto.

Mga kaibigan, alam kong alam niyo ang mga totoong taong makakatulong sa atin. Mga taong hindi nagtatanim ng bulaklak sa bakuran tuwing panahon ng eleksyon. Sila ang iboto natin. Gamitin natin ito para sa ikauunlad ng nakararami.

Sa darating na eleksyon, maraming mabulaklak na salita na naman ang lilitaw sa bawat kalye ng ating bayan. Mga mukhang akala mo’y maaasahan ng lahat. Huwag tayong magpakabulag. Tayo ang magtatakda ng lider na aakay sa atin sa kaunlaran.

Piliin natin ang isang lider na hindi lang lumilitaw tuwing eleksyon; bagkus, isang lider na maasahan natin sa bawat segundo at bawat minuto.

Think ten times, before you shade!