TALUMPATI | Ilegal na Droga

Isang lalaki nakapatay; sanhi? Ilegal na droga. Isang pulitiko nahuli; sanhi? Ilegal na droga. Saan mang sipatin, krimen ang bunga ng ilegal ng droga. Ngunit, bakit talamak pa rin ito sa ating bansa?

Magandang araw sa lahat ng mga nakikinig.

‘Kapit sa patalim’ – ito na marahil ang bukambibig ng mga Pilipinong naghihirap. At, paniguradong kasama sa kanilang listahan ang ilegal na droga. Hindi maitatanggi ang katotohanan na kaya marami ang tumatangkilik sa ganitong gawain ay dahil sa kahirapan. Isang desisyong mas pinipili ang kapahamakan kaysa sa kagutuman.

Datapuwat, ang paghilig sa ganitong klaseng desisyon ay sumasanga ng iba’t ibang masamang epekto. Nang dahil sa droga, nagiging kriminal ang isang tao. Nang dahil sa droga, may pamilyang nasisira at nagdurusa. Nang dahil sa droga, maraming Pilipino ang mas nalulugmok pa sa kahirapan.

At ang mas nakababahala, nang dahil sa droga, dumidilim ang pag-asa ng ating kabataan. Ayon sa Dangerous Drugs Board, tinatantiyang may 3.7 milyong mga Pilipino ang maituturing na adik sa ilegal na droga noong taong 2016. Animnapu’t limang poryento rito ay mga kabataan.

Nakalulungkot isiping milyon-milyong mga kabataang Pilipino ang nasira ng droga.

Kaya ang tanong ng karamihan, kailan pa masusupil ang ilegal na droga sa ating bansa? Ilan pang kabataan ang mawawalan ng kinabukasan? Ilang pang mahihirap ang masisilaw sa perang dulot nito? Ilan pang pamilya ang masisira para sa panandaliang kasiyahan?

Bagamat nagsisimula na ang ating pamahalaang supilin ang problemang ito sa bansa, hindi pa rin nito mabubura ang katotohanang malayo pa ang lalakbayin ng adhikaing ito. Malayo pa hangga’t hindi nasusupil ang tunay na ugat ng problema. Malayo pa.

Kapit sa patalim – isang kataga ng pagiging matiisin ng mga Pilipino. Isang katagang marapat nang burahin sa paniniwala ng lahat. Hindi magiging sagot sa problema ang isa pang problema. Hindi maghihilom ang sugat kung daragdagan pa ng isang sugat. Ang kahirapan ay lalong magiging mahirap kung sa mali ka kumakapit.

Hindi droga ang sagot sa kahirapan. Hindi ito lubid na mag-aakay sa iyo sa kasiyahan o kapayapaan.  Isa itong kumunoy na lalo pang magpapalubog sa iyo.

Maging ehemplo tayo sa mga kabataan. Tulungan natin ang ating bayan na maging mas kaaya-aya para sa susunod pang henerasyon. Isipin natin ang sariling kinabukasan, ang kinabukasan ng pamilya at ng iba.

Burahin natin ang ilegal na droga sa ating listahan. Tanggalin sa mga pagpipilian.

Maging disiplinado, at parating isipin kung ano ang tama at nakabubuti para sa lahat.

Say no to illegal drugs.