TULA | Sa mga Bulaklak ng Heidelberg ni Jose P. Rizal

Sa mga Bulaklak ng Heidelberg

ni Jose P. Rizal

isinalin sa Filipino ni Virgilio S. Almario

Hayo kayo sa bayan ko, hayo, mga banyagang bulaklak

inihasik ng biyahero sa gilid ng munting daan,

at sa lihim ng asul na langit

na tanod sa mga mahal ko

ay isalaysay ang pananalig

na dala ng peregrino mulang lupang tinubuan!

Hayo kayo at sabihin… at sabihing nang ibukas

nang marahan ng liwayway ang kalis n’yo

sa tabi ng nagyeyelong Neckar,

nakita ninyo’y katbi siyang lubhang matahimik,

iniisip ang lupaing palagiang may tagsibol.

At sabihing kapag ang liwayway

na nagnanakaw sa inyong samyo

ay nagbulong ng maharot na awitin ng pag-ibig,

ibinubulong-bulong din niya

ang awitin ng pag-ibig sa wika n’yang katutubo;

na kapag kinumutan ng araw

ang taluktok ng Koënigsthul sa pang-umagang bulawan

at sa bisa ng init na angkin

pinasigla ang bukirin, kagubatan, at ang dawag,

nagpupugay naman siya sa sa araw na sumisikat,

nagliliyab sa taluktok ng bundok ng kanyang bayan!

At isalaysay ninyo ang araw

noong ipunin n’ya kayo sa tabi ng nilalandas

sa may gitna ng ruwina ng feudal na kastilyo,

Sa mga pampangin ng Neckar, o sa gubat na malilim,

isalaysay ang sabi sa inyo

noon, kung paanong anung ingat,

sa loob ng isang aklat na luma na’t lubhang gasgas

ay inipit ang mabango at maselan n’yong talutot.

Dalhin, dalhin, O, mga bulaklak!

pag-ibig sa ‘king mga pag-ibig,

kapayapaan sa bansa at masupling nitong bukid,

mga birtud sa babae, sa lalaki’y pananalig,

at kalusugan sa mga anak

na nilukob ng tahanan ng ninuno’t sakdal-linis.

Pagsapit ninyo doon sa pampang,

itinatak ko sa inyong halik

ay kaagad na ilagak sa bagwis ng mga simoy

upang ito ay pumailanglang

at mahagkan ang lahat kong sinasamba’t iniibig!

At, ay! pagdatal, mga bulaklak,

makikimkim pa marahil ang kulay na matitingkad,

ngunit kapag napawalay sa lupaing iniibig

at inutangan ng inyong buhay,

maglalaho din ang halimuyak;

dahil samyo’y diwang hindi makapagpapalit-langit

ni lilimot sa silahis na sumaksi sa pagsilang.